Lotò occitan

Los lotòs classics son un pauc rassègas : una chifra, una chifra, una autra... quina ! Rai, l'adrenalina e l'enveja de ganhar fan passar lo costat repetitiu. En mai, per evitar lo risque de contestacion, los organizators t'organizan aquò serioses coma de papas ! De temps en temps, çaquelà, punteja una galejada...
Dempuèi sabi pas quora, benlèu quaranta ans, a Sant-Juèri, s'en tira un d'especial, en occitan e per dire de metre encara mai la lenga en valor, amb d'expressions risolièras, de còps coquinas, per los tres quarts dels numèros.
L'animator ditz l'expression en prumièr, puèi lo numerò en occitan, e a la fin en francés. Lo monde an lèu fach de memorisar las expressions e lèu s'ausís cridar quina un còp la colhonada dicha, abans que l'animator age lo temps d'anonciar lo numerò !
Aquí un escapolon dels pus risolièrs : la cadièira (4), la pigassa (7), cuol en bas coeta en nau (6), la fèbre monta ! (39), un caga l'autre finta ! (41), l'auca sortís (63), cap e cuol ! (69) e per acabar la mameta (89) e lo papeta (90). Aqueste an, lo lotò occitan de Sant-Juèri se debanarà, amb tot son ravitalhament de gormandisas e de cambajons, al Capial, plaça Sant-Jòrdi, lo dimenge 22 de janvièr a partir de 14 oras 30.
Vos i esperam nombroses !